Terugblik carnaval 2025
De rust is ondertussen wer iënigszins wedergekiërd in d’n Haegelsum nao enne geweldige vastenaovend, ma beej deze kiêke we nag efkes terug nao wát d’r de âfgeloëpe daag allemaol gebeurd is.
Vriedágs begos ut met de woorddinst in de kaerk, gehiël volges de traditie opgeluusterd door de âldpreense en -vôrste. Ut waor wer schon iniën gezatte en veurgedragen door Leon en Marcel en dit alles in het thema van mekaar á-kiêke en nao mekaar umkiêke. Nao enne rustdaag op de zaoterdág kos ut op de zondágmaerge daan echt beginnen, toen preens Hans d’n 2e, prinses Ivonne en de adjudânte Sjef en Julian in de Merthal de sleutel van d’n Haegelsum ovverhandigd krege as start ván drie daag vôl met lol, gein en plezeer. Nao de sleutelaoverdracht toog d’n Haegelsumse karavaan nao d’n Haegelsum um vánaf dát momaent ok echt alliën nag ma in ut Tuuteriêk te knallen, en dao bedoelen we da neet de waterleiding ván Vôrs Freek mei 😉 Dìzelfde middág waor namelijk de jeugdboorebrullef, wao boor James en boorin Eliza in d’n onecht verbonge woorte in ut thema van Chicago. Ze hajje en schon toniëlstuk gemákt ovver de lokale henneboore waor-ì oêteindelijk ut huwelijk in d’n onecht voltrokke woort. Daonao bleef ut nag lang onrustig in d’n Tuutetaempel en woort d’r nag een duchtig fiëstje gebouwd door de jeugdboorefamilie en alle aanwezigen.
Dágs d’r nao waor ’s maerges ut Kuukesbal in de kantine, waor door Jeugdprinses Bo en de adjudânte Tessa en Naomi met de oêttrekkende groep een gezellig fiëstje gemákt woort met alle kuukes oêt ut Tuuteriêk, en daonao waor ut daan tiêd vur, vur zòver bekend, de alleriërste paerderennen oëit in d’n Haegelsum. Jong Nederland haj een del volbloeden wiëte te charteren en onder ut oëg van een groët publiek kwaom oêteindelijk Ginger Gallop as winnaar oet de bus, toevallig ok nag net ut paerd waor de hoëfdrolspeulers ván deen daag, boorebroedspaar Mary en Russel, zich staerk vur hajje gemákt. In ut toniëlstuk leek d’r nag efkes enne keenk in de kabel te komen, ma oêteindelijk stong Mary en Russel daan toch te straole op de bühne met eur tuuteringe um de vingers geschaove. Optréjes ván de boorefamilie, de Moelbaereboys, de Breurkes en last but not least ok nag Richtig Spiêt zörgde dát ut iën groët fiëst woort wies in de late urkes.
Waor ut op carnavalsdeensdág mei wal ’s lâstig ken ziên um op te starten, waor dao dit jaor gen aenkele spraoke vá. De zon scheen de gaten in de grónd en zörgde zoë dát ut Tuuteriêk wer fris en fruitig ontwákte vur de látste carnavalsdaag van ’t seizoen. Ok dit jaor trok d’r wer enne hártstikke schonnen tocht door ut dörp met maar lifst 27 deelnemers. Ondanks dát ut bijna terraswaer waor trok d’n Haegelsum daonao gelukkig toch massaal nao d’n Tuutetaempel um dao de priêsoêtreiking te kiêke en nag enne látste kiër mei te hosse en te springe op de muziek ván Goedzat en d’n DJ. Nao de officiële âfsloêting rónd 22.30 bleef ut nag lang gezellig wies dát de látste toëne oet de boxen wegstorven.
Tot slot nag wal efkes 1 ding: d’n Haegelsum ken carnaval viere mede door de inzet ván ennen hiële hoëp vreejwilligers. Beej deze durrum en hiël hártelijk dank je wel aan iederiën deen zien of eur stiëntje beejgedrage haet aan wer enne fantastische carnaval! Alaaf!
Vur degenen die nag efkes wille naogeniete ván al deze festiviteiten: op 23 márt a.s. bestiët de meugelijkheid um alles nag ’s enne kiër nao te belaeve of te bepraote tiejes ut Kiekjes Kiêke in Café Debije. Dao ken ok de USB-stick met alle foto’s ván ozze hoffotograaf Marcel Hakvoort , Statiefoto’s vaan Stef en Nelly Dekker en de filmkes vaan Chretien Sijbers aangeschaft waere.
Haopelijk wies da!
