Terugblik carnaval 2024
Op aswoensdág woort d’n Haegelsumse carnaval officieel âfgeslaote met ut striêke ván de carnavalsvlaag. De daag d’r veur waor ut namelijk wer iën groët fiëst in os dörpke tusse Piël en Maas. Ut begos al op de vriedág met de traditionele woorddinst, opgeluusterd door de âldpreense en -vôrste. Ondanks dát ut á-staeke van de Paaskaers neet gâns vlekkeloos ging, waor dát gelukkig gen veurbode vur de rest van de carnaval. Want nao enne rustdaag op de zaoterdág begos ut op de zondágmaerge daan echt, toen ozze preens Raymond met zien prinses Laura in de Merthal de sleutel van d’n Haegelsum toebediëld kreeg vur de start van 3 daag ván lol, gein en plezeer. En vanaf dát momaent waor ut vort in d’n Tuutetaempel te doon. Dìzelfde middág waor namelijk de jeugdboorebrullef, alwaor boor Jur en boorin Roos in d’n onecht verbonge woorte. Vur Roos waor Jur bliekbaar “The one that she wants” en Jur waor op zien beurt “Hopelessly devoted” aan Roos, want in ut thema van Grease woort d’r een moëi fiëstje gebouwd as of ut iën van de beste “Summer nights” oëit waor.
D’n daag d’r nao waor ’s maerges ut Kuukesbal in de kantine, waor door Jeugdpreens Koen en prinses Nina en hun oêttrekkende groep een schon fiëstje gemákt woort met alle kleinste kuukes oêt ut Tuuteriêk en ’s middágs waor ut daan de beurt aan boorebroedspaar Marco en Verona um, in de stiel ván 1988, hun jaowaord aan mekaar te gaeve ten aoverstaon van de gânse boorefamilie, de voetbalclub en alles wát d’r um en d’r aan hing. Marco mos nag wal iërs efkes bewiêze dát ie “Haegelsum mien dörpke” kos zinge, ma naodát dát gebeurd waor kos de trouwereej daan eindelijk ván start. Nao de receptie en de nuüdige Tosti Döner’s oet Twannie’s Smulhoek kos ut fiëstje echt los en woort d’r dán ok duchtig gevierd wies dát d’n DJ zien leste pletje dreijde.
Nao zon geweldige daag zujde verwâchte dát de piêp beej de miëste tuute en tuutinne wal has laeg zuj ziên, ma niks bleek minder waor; op carnavalsdeensdág trok d’r namelijk enne lange, bónte stoet door ’t dörp wao ge U taege zegt. Maar lifst 35 nummers deeje d’r mei, met wages, groepen en losloëpende gekke van klein wies groët en ândersum. De jury haj daan ok enne fleenke kloêf um heer díe paar gelukkigen oêt te kiezen die d’r met de priêze vandoor mochte gaon, al is ut natuurlijk zoë dát in feite alle diëlnemers winnaars ziên. Nao de priêsoêtreiking in ennen bomvolle Tuutetaempel ginge de Haegelsume kártrekkers nag iëne kiër veurop um door te knalle wies in de late urkes.
D’n Haegelsum mog trots ziën op zonne biëstig gojje carnaval in ‘t eige dörp. Dit alles waor evvel neet meugelijk gewes zónder d’n ì-zet van veule vreejwilligers, dus beej deze een groët applaus vur iederiën deen d’r aan beejgedrage haet um de carnaval in os dörpke wer tot een succes te maken! Alaaf!
Vur degenen die nag efkes wille naogeniete ván al deze festiviteiten: op 3 márt a.s. um 13.11 oor bestiët de meugelijkheid um alles nag ’s enne kiër nao te belaeve of te bepraote tiejes ut Kiekjes Kiêke in Café Debije. Dao ken ok de USB-stick met alle foto’s ván ozze hoffotograaf Marcel Hakvoort aangeschaft waere. Haopelijk wies da!
