Terugblik carnaval 2026
Op ut momaent ván schriêve is ut aswoensdág en is de rust in d’n Haegelsum wer iënigszins wedergekeerd. Ma wát waor ut wer enne schonne vastelaovend heer in os eige Tuuteriêk!
Ze zegge mei dát vriedág d’n 13e ongeluk brengt, ma in d’n Haegelsum bleek dát in ieder gevâl gen slechte veurbode te ziên, want op deen daag begos ut carnavalsweekend met de traditionele carnavalswoorddinst. Dit jaor in een iets ânder jeske gestaoke, ma zoë-as gebroêkelijk wer prachtig opgeluusterd door ut OPOV-koër. Iën en ânder stong in ut teiken ván “Mák ów nì druk” en dát déje we in d’n Haegelsum daan ok good door op de zaoterdág een rustdagje ì te lassen um nag efkes op te laaje. Op zondágmaerge toog d’r wer ennen bóntgekleurde stoet fietsers richting de Merthal um getuûge te ziên ván ut ovverhandigen ván de sleutel door d’n burgemeister aan preens Rik, in ut gezelschap ván prinses Maartje en de adjudânte Berton en Luuk. Ok de Happy Hotdogs mógden acte de présence gaeve met o.a. hun hit “Vastelaovend is lit”. Dit waor de officiële start ván drie daag vôl met lol, gein en plezeer en dát waor beej terugkomst in d’n Haegelsum ok wal te zeen beej de trouwereej ván ut jeugdboorebroedspaar Fien en Gijs. Nao een leuk toniëlstuk en een good bezochte receptie ging de jeugdboorefamilie veurop in ut fiëstgedruis in ut thema ván de Crazy Cross met as âfsloêting gezellig frietjes aete beej Fien thoês in de scheur.
Op ut Kuukesbal in de kantine op maondágmaerge zatte jeugdpreens Wesley met zien adjudânte Dirk en Jesse en hun gevolg de taent efkes lekker op de kop en mákten d’r een schon fiëstje vá met alle kuukes oet ut Tuuteriêk. Dì middág waor ut tiêd vur d’n iërste Hegga Cross beej zaal Debije veur op ’t terras. Nao een spetterende presentatie ván de diëlnemers door de beide adjes vur de sfeer kos d’r gecrosst waere en nao drie spectaculaire races kwaom Gerrit “Gaspedaal” Dwarsdrift, oftewel Guus Peeters, daobeej oet de bus as winnaar en ging d’r vándoor met de Gouden Nozembokaal. Vervolgens ging de gânsen höf op nao binnen en nao een vermakelijk toniëlstuk waor-ì oet de deuk gedaon woort hoe ut d’r nou eigenlijk aan toe giët op zonne Zwárte Cross, woorte Barry en Christien in d’n onecht gehuwd door de iënige echte tante Rikkie. Verder waore d’r nag optréjes, gehiël in lien met ut thema, ván de boorefamilie en Orgel Corry, Zenger Rotsjo en De Buuls, en DJ Ruud dreijde ut gehiël aan mekaar tot iën groët fiëst wát door de Zwárte Cross zelf nag maar ’s ovvertroffen mot zeen te waere deze zomer.
Op deensdág waor daan alwer de látsten daag á-gebraoke met traditioneel d’n optocht op ut programma. Helaas moste d’r aenkele búje getrotseerd waere, ma dát mógde de pret neet drukken. Ennen bónte stoet ván 30 nummers trok door de straote en daonao woorte in d’n Tuutetaempel de priêswinnaars bekendgemákt door jeugdvôrs Nina en ceremoniemeister Hanne. Op de muziek ván Lex Uiting en d’n DJ woort d’r nag enne látste kiër meigezonge, gehost en gespronge door de gânse zaal wies dát in de late urkes de leste pletjes gedreijd woorte en carnaval 2026 op zien end kwaom. Wát we daobeej zeker neet moge vergaete te vermelden is dát we wer terug kunne kiêke op enne prachtige carnaval mede door d’n ì-zet ván veule vreejwilligers veur en achter de schermen. Durrum beej deze een hiël hártelijk dank je wel aan iederiën deen dao, op welke manier dán ok, aan beejgedragen haet. Alaaf!
Vur degenen die nag efkes wille naogeniete ván al deze festiviteiten: op 8 márt a.s. bestiët de meugelijkheid um alles nag ’s enne kiër nao te belaeve of te bepraote tiejes ut Kiekjes Kiêke in Café Debije. Dao ken ok de USB-stick met alle foto’s ván ozze hoffotograaf Marcel Hakvoort aangeschaft waere. Haopelijk wies da!
