Oetreiking Vergulde orde vaan Verdinste!

Vergulde Orde van Verdinste vur Piet Geurts

Zaoterdag 12 fibberwarie haet Piet Geurts de Vergulde Orde van Verdinste ontvange oet hànd ván preens Jop I. Piet haet een indrukwekkende staat ván dinst beej de jeugdafdiëling van VV Haegelsum, waor heej al miër daan 50 jaor bestuurslid is. Heer haet ie diverse taken vervuld, zoë-as onder ândere ut (wedstrijd-)secretariaat, de planning ván ut kantine-personiël en de organisatie van veule activiteiten, waorónder ok ut Scharrelbal vur de Haegelsumse jeugdveriënigingen. Ok in ut carnavalslaeve is Piet gennen onbekende. Ván 1970 wies 1980 waor heej sikkretaris ván Jeugdcarnaval Haegelsum en ván 1978 wies 1985 verzörgde heej diezelfde taak beej C.V. D’n Tuutekop. In die jaore waor ut aalt een sport vur de leden ván de carnavalsveriëning um tiejes de róndvraog met de miëst vremde vraoge te komen en Piet lâg daat daan, as enne ware woordkunstenaar, wer zò moëi meugelijk vâst in de notulen. Leden spitsten zich d’r met vergaderingen daan ok aalt op hoe Piet de vraoge en antwoorden van de vurrige kiër haj vâstgelâg en op humoristische wiêze veurloos. Ok waor Piet verschillende jaore betrokke beej ut schriêve ván teksten vur de Haegelsumse zittingsaovende en stong ie in de jaore ’70 zellef met een gruupke op de plânke tiejes de liedjesaovend. Gedurende de twedde haelft van daat decennium waor Piet lid ván de waerkgroep Jeugd ván OJC Phoenix en in diezelfde periode waor heej ok nag iën van de dragende krachten achter de waerkgroep Jeugd van de dörpsraod. In 1983 waor Piet initiatiefnemer ván buurtveriëniging Hombergia in de Hombergstraot en binnen deze club waor ie, tot aan zien verhoêzing nao Hôrs (of Haegelsum-Noord, zoë-as Piet ut zellef leever umschrieft) ok aalt de groëte kártrekker. Tot slot haet Piet nog jaorenlang diël oêtgemákt ván enne groep fanatieke wielrenners die regelmaotig ut staole ros beklomme vur een route die Piet wies in de peuntjes veurbereid haj en die van tevurre straot vur straot veurbespraoke woort. Later grui-jde deze groep oêt tot fietsclub “De Slappen Bând”. Oet waardiëring en dânk vur deze oêtgebreide staat van dinst haet ut bestuur ván C.V. D’n Tuutekop beslaote um Piet te onderschei-je met de Vergulde Orde van Verdinste.

Gerelateerde berichten